शार्दूलविक्रीडित छन्द
१. फोटो माग भयो पठाइन गयो, सोचेर जे जे कुरा आफ्नै कोमल अङ्ग खुल्छ जसरी उम्रोस् भनी आँकुरा म हाँसो मुस्मुस राखियो अधरमा, संसार देखोस् भनी आत्माको भवितव्यमा कुशलता पक्रोस् खुलोस् जीवनी ।
२. ल सोझै नाम नराखियोस् हरफमा कान्ता तथा कामिनी राख्दा नाम अनामिका गजबले चम्किन्छ मन्दाकिनी आफैं बादल गरियोस् गगनमा घन्की बजोस् मादल आओस् अब्बल कल्पना वरफमा पग्लेर गङ्गाजल ।
३. पुष्पा पुष्पित सौरमान प्रतिमा आई पसून् देवल होस् संकेत सफा विनम्र लयमा, सङ्क्षेपमा केवल फोटो माग भयो पठाइन भयो शङ्का जहाँ व्यर्थमा आफैं झल्मल छन् सचित्र कविता साहित्यका अर्थमा ।
४. प्राणी प्राण उपासना सरस्वती छन् राधिका मल्लिका डाके उत्तम तामझाम कविले वाचाल छन् झल्लिका आभारी म छु भन्दछन् कवि सफा उन्मुक्त आभामय घेर्छन् मल्मल कीर्तिमान क्षितिमा फोटो तथा वाङ्मय ।
५. फोटो प्रेषित नामबाट जसले राख्छन् मनोभावना साँचो नाम समेत मूर्त रचना छाप्ने छ सम्भावना भोले साथ उमा खुला प्रणयमा हेरिन्छ सद्भावना मामा भन्न छ कामना हृदयको तैयार उत्साहमा ।
६. फोटो बोल्छ तटस्थ खोल्छ मनका जम्मै भकारीहरू जो प्रारम्भिक तत्वज्ञान गहिरो भर्दै सवारीहरू नौलो चल्दछ चाल सत्य पथमा आमोद भारी भरी बास्ना मङ्ङ चलाउने छ रसिलो सम्पन्नता मञ्जरी ।
७. फोटो खोल्छ कुरा यथार्थ मनका सन्देह फाली पर आत्मानन्द दिलाउने किसिमले सौजन्यमा उर्वर आफैं चिन्न चिनाउने विषयमा चिम्लेर आँखा बसी आइन् ब्रह्म मुहूर्तका समयमा विस्तारमा भारती ।
क्रमशः
